Wednesday, February 24, 2010

رســــــــالـــــــــــــــــــه


انا لسه مستنى !!! ولكل شىء اخر

وانتى بعيد عنى ... تعبت على الاخر

لا حــب بيفــرّح ولا حضــن بيريّــح

عالدنيا من بعدك يا حبيبتى مش قادر

.

Friday, November 20, 2009

عــــــتــــــــــــــاب


عاتب عليك يا هوى , من اللى حصل ليا

حبيـبى ليـه يا هوى , تستخســره فيـا

بـعـدتـنـى عنـه , وحـرمـتـنـى منـه

عملـت ايــه علشان يقسى كـده عليـا

****

حبّبته ليه يا هوى فى جرحى واوجاعى

راعيتـه كتـير يا هوى ومعدش بيراعى

فتحتلـه قلبـى , وهــو ده ذنبـى

ويامـا خوفـت عليـه وشلته فى عنيا

عاتب عليك يا هوى , من اللى حصل ليا

****

لو كان نصيبى كده , شغلنى ليه بهواه

وازاى بيعمـل كده , ولسـه بتمناه

مكونتـش استاهـل , يجرحنـى بالساهل

صعبـان عليـا قـوى يعمـل كـده فيا

عاتب عليك يا هوى , من اللى حصل ليا

**

Sunday, October 11, 2009

رسالـه الـى حبيبتـى ,,, التـى لـم القاهـا بعـد


سنيــن بخبّـى الحنيّـة مستنى اليوم اللـى تجينـى

مدارى حنين جوة فقلبى ومدارى الشوق اللى فعينى

بطمّـن نفسـى واقـول بكـرة بـس انتـى فيـن

*****

ايام بتفوت وتروح منى وقلبى يقولى انك جايه

سهران الليل وانا مستنى وعارفك زيى مستنيه

مشتاقـة وخايفـة وملهوفـه ومليانــه حنين

*****

غيبتك طالت بس انا هصبر

لـو حتـى لقانا هيتأخر

شوقى هيزيـد اكتر واكـتر

مفهاش كلام

**

كـل دقيقـة ساعـات بتعـدى

والليل بيطول وانا لوحدى

سرحـان وأديـا علـى خـدى

مش قادر انام

**

لا تيأسى فلقائنا مقدّر , وانا اراه قريبا

*

Thursday, August 13, 2009

ارتــحـــت يــا قـلـبـــي


ارتحـت يا قلـبـى ولا لسـه عنـدك امـل

بعد اللى عملته فيا قولى ايه العمل

**********

خوفتك منه ياما , وقلت بلاش عشانى

فضلت تقولى لأه , حن متبقاش انانى

وادينى مشيت وراك واهو باعك واشتراك

وقبل ما يلم جرحك اهو جرحك جرح تانى

**********

الغلطه عندك انت , ليه مسمعتش كلامى

اهو زيه زى غيره , الفرق فى الاسامى

وزى ما نسيت زمان هتنسى ده كمان

لسه الحياه قدامك ولسه الحياه قدامى


..

Saturday, July 4, 2009

خــــــــــايـــــــــــف


بقيـت خايـف من الايـام ومن بكرة

بقيت عايش على الاحلام على الذكرى

******

بعيش احسن ما اشوف موتى

وبكســر صمتـى وسكوتــى

وبصــرخ بــس فـى الاخــر

مـا بسمـع غيـر صدى صوتى

******

سنيـن وأديـــا مربوطــة

وروحــــى فيــا مكبوتـــة

بحــس إن علــى ضهــــرى

حمـــول الدنيــا محطوطـة

******

وحاســس باللى جواكى

وسامع فى الفضا نداكى

وقلبى مـن بعيد شايفك

وروحـى برضـ شيفاكى

******

ومـش بالقلب ولا الروح

ومين يسمـع لطير مدبـوح

كـان املـه يعيـش فرحــه

فى زمن الفرح مش مسموح

....

Friday, June 5, 2009

مش هستنى العمر يضيع


انا لازم انسى اللى فات ومقولش ليه

اما اللى جاى من عمرى هتعود عليه

مش ممكن افضل اسير فى حب مات

ولا ممكن افضل عايش على الذكرايات

زى ما نسيت هقدر انسى زى ما باعت هقدر ابيع

قلبى خلاص لازم يقسى مش هستنى العمر يضيع

................

واتارى كل اللى بينا ده كان وهم فى خيالى

لو كنت صحيح فى جنه مكنش ده يبقى حالى

لا حسيتى بحنينى ولا حسيتى بهوايا

لو كنتى حبتينى كنتى فضلتى معايا

وكنتى مسبتنيش

.....

زى ما نسيت هقدر انسى زى ما باعت هقدر ابيع

قلبى خلاص لازم يقسى مش هستنى العمر يضيع

................

من تانى لا يمكن ارجع ولا هسمع مهما قولتى

حبيبتى معدش ينفع انا اسف مش حبيبتى

لا عتاب ممكن يدارى على قلبك يوم ما بعتى

حبيبتى انا كنت شارى بقولك مش حبيبتى

ايه لسه محستيش

.....

زى ما نسيت هقدر انسى زى ما باعت هقدر ابيع

قلبى خلاص لازم يقسى مش هستنى العمر يضيع

..

Friday, May 15, 2009

دور الحبيبة


صدقنى حولت يامة بس اعمل ايه نصيب

انا عارفة إن كلامى ساعات بيكون غريب

بس انا مش عارفة اخبى ولا قادرة اشيل فقلبى

وانت اللى بعدت عنى لما احتجتك قريب

وانا مش هكون ضحية ولا هعيش فى تمثليه

العب دور الحبيبة وانت دور الحبيب

ســامـحـنــــــى

..

Monday, March 9, 2009

مـكـتـــــوب عـلـيــــــــا


مكتوب عليا اشيل الجرح جوه كيانى

بضحك انا تمثيل وابكى وانا وحدانى

وادى السنين بتدور وقلبى انا مكسور

بكرة يفوت الدور وانا لسة فى مكانى

***********

ليه الجراح بتعيش والفرح ليه بيموت

والدنيا مبتديش غير اللى عالى الصوت

ياخد الزمان ويجيب عايش لوحدى غريب

واللى افتكرته حبيب راح لواحد تانى

***********

الليل مكان الوجع وانا عمرى كله ليل

الحزن منى شبع والحزن باله طويل

العمر عدى وفات والقلب كله اهات

الفرح يمشى ساعات يجى عندى انا وينسانى

***********

مكتوب عليا اشيل الجرح جوه كيانى

بضحك انا تمثيل وابكى وانا وحدانى

**

Tuesday, December 23, 2008

انـتــى عـنوانـــــى


انا كنت تايه قبل منك وانتى عنوانـى

كملتى فيا حاجات كتير يا حبيبتى نقصانى

حبيت معاكى الدنيا والناس والحيـاه

نسانــى قلبــك كـل جـرح وكـل اه

الحياه وانا جمب منك ليها لون تانـى

************

قبل اما اشوفك كنت عايش بس كنت ازاى

لا حاجة فارقة ملى فات ولا حاجة ملى جاى

دلوقتــى بحســب الدقايــق والساعــات

نفســى اعــوض كــل لحظــة ملــى فـات

خايـف اغمـض عينـى عنـك حتـى لثوانـى

...

Friday, November 21, 2008

وهــنـعـمـــل ايـــــه ؟


وهنعمل ايه فى نصيبنا ؟ وقلوبنا بختها


تتلاقـى وغصــب عنهــا تفارق حبهـا


الدنـيـا تنـساهــا والجــرح يمـلاهـا


مـكتوب عليهـا تبكـى فى عـز فرحهـا


لا عمـر الفرح يكمـل وعمره حتى يدوم


وإن مره جيه معانا بيمشى فى تانى يوم


سامحنـى يـا قلبـى البعـد مـش ذنبـى


هنسيـب بعـض وادينـا بتحضـن بعضهـا


وهنعمل ايه فى نصيبنا ؟ وقلوبنا بختها


تتلاقـى وغصــب عنهــا تفارق حبهـا


...

Friday, October 17, 2008

عيد ميلادها


النهارده عيد ميلادها ,,, كنت بفرح بيه زمان


الورود فى يوميها تطرح ,,, تنفتح قبل الأوان


والطيور تفضل تغنى ,,, تجرى على زهر الريحان


والقلوب تسأل حيارة ,,, ايه جرى ايه اللى كان


وانا وحدى بس عارف ,,, عيد ميلادها من زمان


لسه الفراق معرفش يكسرنى ,,, مهما السنين حاولت تغيرنى


حاسس هواها بيملى دنيايا ,,, مهما ادارى واخبى جوايا


...

Monday, September 15, 2008

مـعـدنــا فــــى الـجـنــه


معدنا قرب يا حبيبتى متقلقيش


هيجى يوم مع بعض فيه لازم نعيش


احلمنا فيه يتحققوا وكلامنا فيه هيصدقوه


وحياتى عندك قوّى قلبك متخفيش


....

Tuesday, August 19, 2008

خـلـيـكــى جـمـبــى


الأغنية دى اتكتبت واتلحنت واتوزعت مخصوص عشان صديقى وزميلى احمد عيسى

بمناسبة خطوبتة وهو اللى غناها لعروسته يوميها

انا بقوله الف مبروك وعقبال ما اكتبلك اغنية الفرح

****************
من يوم ما شوفتك قلبى قالى دى نصيبى

شوفت فى عيونك يعنى ايه كلمة حبيبى

يا دوب نظرة من غير كلام ...... لاقيتنى دايب فى الغرام

حسيت بقلبى انه طاير فى الهوى

حلمت يامه وحلمى كان زى الخيال

وقلت انك تبقى ليا ده شىء محال

فضلت صابر من زمان ...... وكل شىء جاى بأوان

واهو النهارده حبيبتى جيه واحنا سوى

خليكى جمبى واوعدينى متسبيش
حد يفرق بين هوانا وقلبنا

خليكى جمبى من النهارده خلاص مفيش
حد يعشق حد غير انتى وانا

خليكى جمبى سيبى قلبى خلاص يعيش
خلاص حبيبتى الغرام مكتوبلنا

خليكى جمبى سيبى نفسك متخفيش
من النهاردة انا وانتى بس لبعضنا

خليكى جمبى ............. خليكى جمبى

..

Thursday, July 31, 2008

حـبـيـبـتــى سـاكـنــه هـنــا


كل ما اعدّى واقرّب اهـدّى يمكـن أشوفـك مـره

عينـي تشـد فى قلبـي لجوه وعقلـي يشـد لبـره

أفضـل واقـف وحـدي وخايـف لحسـن حـد يشوفني

يسألنـي أنـا بعمل إيه وإيه اللي موقفنـى

أمشــى شويـة وارجـع تانـى اتلفـّت حوليـا

وادعى يا عالم باللي فى قلبي واللي بيحصل ليا

ارحـم عاشـق مـش بأديـه البعـد ولا بأديهـا

ملّـى عنيـا منهـا شويـه وطمّـن قلبـي عليها

نفسـي أشوفهـا سعيدة بتضحـك لو مره فى خيالي

مـانا مش هفرح لما اعرف إن جرالها اللي جرالى

من يوم ما بعـدت عنـى واهو فات اكتر من سنة

عمري فى يوم ما نسيت إن حبيبتـى ساكنـه هنـا

...

Monday, July 14, 2008

اوصـفـلـــك ايــــــه


اوصفلك ايه ..... مفيش فى قلبى كلام يعبر عللى فيه

اوصفلك ايه .....انا قلبى حاسس حب عمره ما حس بيه

قلبى يوم ما لقاك ..... وياك

حس بحاجات مكنش قبلك دارى بيها

كل ثانيه معاك ..... بهواك

قبلك مدوقتش فرحه جمبك دوبت فيها

احلم بأيه ..... هوانا حقق كل حلم حلمت بيه

احلم بأيه ..... ملكت بيك الدنيا واحلم تانى ليه

قلبى يوم ما لقاك ..... وياك

حس بحاجات مكنش قبلك دارى بيها

كل ثانيه معاك ..... بهواك

قبلك مدوقتش فرحه جمبك دوبت فيها

بحبك ..... بحبك ..... بحبك

..

Thursday, June 19, 2008

كــل يـــوم بــيـفــوت


كـل يـوم بيفوت عليــا .... بـلاقـى نـفـسـى بحبها

هى ليه مش حسه بيا .... وانـا اللى قلبى حسها

يوم ما جت عنيها فى عنيا .... كـان مـونايـا اقولها

هى ايـه بالنسبـة ليـا ..... وارمى نفسى فى حضنها

-------------------------------------

بس احساسى منعنى وقلبى انا خايف عليه

لو قالتلى لأ ساعتها كنت ممكن اعمل ايه

--------------------------------------

بشوف عنيها بحـس انى .... قلبى دايب من الغرام

لمـا بتقـربـهـا منى .... بيضيـع منَى الكـلام

ابقى ناوى اقول واغنى .... والقى اخريى يا دوب سلام

اعمل ايه يا رب عينَى .... ملـى فيـا مش بنام

---------------------------------------

ايوة احساسى منعنى وقلبى انا خايف عليه

لو قالتلى لأ ساعتها كنت ممكن اعمل ايه

Thursday, May 22, 2008

الـحـكـايـة جــــرح


لو كان بأيدى اخطفك ..... وابعد بعيد

لو كان عليا ..... بس حبى لو يفيد

ده انا حبى جنه لو شافوها كان زمان

كل القلوب حبت وعشقت من زمان

بس الحكاية اصلها مش بالحنان

ولا بالقلوب الطيبة ولا بالأمان

الحكاية جرح وهيفضل يذيد

-----------------------------

لو شوقى مال كان زمانى اغنى واحد فى الوجود

لو حبى ليكى يعرفوه كان اللى راح لازم يعود

بس الحكاية اصلها مش بالحنان

ولا بالقلوب الطيبة ولا بالأمان

الحكاية جرح وهيفضل يذيد

لو كان بأيدى اخطفك ..... وابعد بعيد

Friday, April 25, 2008

انــــا و هـــــــى


انا وهى اتقابلنا بعد ما مرت سنين

معرفش انا اية جرالى ساعتها ورحت فين

قلت لقلبى بلاش وكأنى مشفتهاش

لحد ما قربتلى وبقه بينا خطوتين

انا قلت مش هسلم وافضل واقف مكانى

انا اللى يبعنى مرة عمرى ما اسامحه تانى

شورتلى من بعيد شفتنى اه اكيد

ضحكت خلتلى قلبى يحن فى ثانيتين

قلبى قالى ما يمكن انت ظلمتها

والبعد اللى ما بينا كان غصب عنها

قبل ما افكر مشيت وعليها بصوت نديت

قلتلها انا قلبى بعدك كان دايب من الحنين

سلمت بشوق عليها اصلى مش قادر

قولتلها انا كنت عارف البعد ليه اخر

وحشتنى ضحكتك وحشتنى نظرتك

البعد طال ما بينا وانا كنت فيه حزين

قالتلى لا سمحنى خلاص مبقتش ليك

انا بس لما شفتك قولت اطمن عليك

انت استعجلت ليه مش ذنبى اللى انت فيه

وذى ما جرحتنى مره جرحتنى مرتين

انا وهى اتقابلنا بعد ما مرت سنين

Friday, March 21, 2008

لـســـه فـاكـــــــــر


بيقولولى لسة فاكر ..... هى نسيت من زمان

قلت قلبى معدش قادر ..... ينسى حبه مهما كان

ده لسة الفراق معرفش يكسرنى

مهما السنين حولت تغيرنى

حاسس هواها بيملى دنيايا

مهما ادارى واخبى جوايا

بيقولولى حرام عليا ..... قلبى بعد فراقها داب

لو يحسوا باللى فيا ..... يعرفوا ايه العذاب

ده لسة هواها مغبش يوم عنى

عايش معاها ولسة مستنى

يمكن اكون عايش فى احلامى

لكن تملى شيفها قدامى

Friday, February 22, 2008

مش مهم


مش مهم إن كنت ناسى

ولا فاكر نفسى ناسى

ولا عامل روحى ناسى مش مهم

مش مهم إن كنت سامع

ولا رايح ولا راجع

ولا جرحى لسه واجع مش مهم

تعمل ايه لما تلقى الدنيا سودة قصاد عنيك

تعمل ايه لما جرحك يبقى طول الليل ماليك

تصرخ بأعلى صوتك ولا تبطل كلام

تتمنى فى لحظه موتك ولا تعيش والسلام

تفرق ايه مش بقولك مش مهم

Thursday, January 17, 2008

حـــــاولت


حاولت يامة بعد منك انى اعيش

وقلت بعدك عن حياتى مهزنيش

بس الحقيقة انا قلبى بعدك تاه اكيد

حتى الندم بعد الفراق مبقاش يفيد

انا بعد منك حتى ملامحى اتغيرت

وإن حد شفنى خلاص دلوقتى ميعرفنيش

Wednesday, December 19, 2007

نـفـســى أعــرف


نفسى أعرف ايه جرالها ... فاكره ولا مش فى بالها

لسه عايشة وحيدة ذيى ... ولا حد بشوق ندالها

نفسى اطمن عليها ... قلبى فاكر مش ناسيها

عايز أعرف شايلة صورتى ... ولا خلتنى فى ماضيها

ايوة بحلم بيها واسرح ... اصل الحقيقة كتير بتجرح

مش بأيدى غصب عنى ... لما تيجى سيرتها بفرح

قلبى دايب من سؤالى ... هى حاسه اللى جرالى

ولا قادرة تعيش حياتها ... ولا حالها ذى حالى

نـفـســى أعــرف

Friday, December 7, 2007

كــــــلام اغــانــى


اللى قالو الحب جنة ... مش داريين بالى احنا فيه

لو صحيح بيحسو بينا ... كانو شافو جرالنا ايه

قالولنا عنه كلام كتير من غير حساب

خالونا عشنا معاه طيور فوق السحاب

واما احنا صدقناه كل اللى قابلناه

يومين فرح وشهور دموع وسنين عذاب

قالولنا عنه فى اوله فرح وامانى

يريح القلب الحزين وياه فى ثوانى

حاكولنا عنه كلام عيشنا فى الاحلام

بس الحقيقة انه كله كلام اغانى